ជីវិតនារីខារ៉ាអូខេ
នៅក្នុងការរស់នៅរបស់មនុស្សម្នាក់ៗ តែងតែមានភាពខុសៗគ្នា តាមស្ថានភាពផ្សេងៗ អ្នកខ្លះកើតមក នៅក្នុងវង្សត្រកូល អ្នកមាន អ្នកខ្លះកើតមកក្នុងវង្សត្រកូលអ្នកក្រ។ ចំណែកអ្នកខ្លះកើតជាអ្នកក្រ តែក្លាយជាអ្នកមាន រីឯអ្នកខ្លះក៏កើតមកជាអ្នកមាន តែ ក្លាយជាអ្នកក្រវិញ ដោយសារតែ រស់នៅមានគំនិតច្នៃប្រឌិត និងមិនចេះគ្រប់គ្រងអនាគតខ្លួនឯងទៀតផង។
មនុស្សគ្រប់គ្នាមិនអាចប្រកែកចំពោះ ព្រហ្មលិខិត និងកាលៈទេសៈ ដែលកើតមានចំពោះខ្លួនឯងប្រចាំថ្ងៃបានឡើយ បញ្ហាផ្សេងៗមិនមែនកើតឡើងតែក្នុងប្រទេសកម្ពុជាយើងនេះទេគឺ វាមាននៅគ្រប់ប្រទេស គ្រប់ជាតិសាសន៍ទាំងអស់ ហើយបើយើងរៀបរាប់អំពីបញ្ហាទុកលំបាកវិញ គឺពិតប្រាកដជាមិនអាចរៀបរាប់អស់ឡើយ ដូចនេះខ្ញុំសូមលើកយករឿងមួយដែលខ្ញុំធ្លាប់ឃើញ និងស្ដាប់ដោយផ្ទាល់ពី នារីម្នាក់ដែលគាត់ធ្លាប់បាននិយាយប្រាប់ខ្ញុំអំពីជីវិតរបស់គាត់ក្នុងការរស់នៅជា នារីខារ៉ាអូខេ ។
កាលពីប៉ុន្មានថ្ងៃមុននេះ ពេលដែលខ្ញុំកំពុងតែធ្វើការអង្គុយក្នុង Office របស់ខ្ញុំស្រាប់តែមានមិត្តភក្តិរបស់ខ្ញុំម្នាក់បាន ហៅទូរស័ព្ទមកខ្ញុំហើយប្រាប់ថា គាត់ចង់នាំនារីម្នាក់មកកន្លែងខ្ញុំដើម្បីធ្វើតេស្តឈាមរក មេរោគអេដស៍ ខ្ញុំក៏ប្រាប់វិញអញ្ចឹងនាំគាត់ក៏បានដែរ ប៉ុន្តែត្រូវឲ្យគាត់ជួបអ្នកផ្ដល់ប្រឹក្សាជាមុនសិន ដើម្បីពិគ្រោះអំពីការធ្វើតេស្តឈាមមុននឹងចាប់ផ្ដើម ! បន្ទាប់មកទៀតប្រហែលជា 15 នាទីពួកគេក៏បានមកដល់ ហើយខ្ញុំក៏ចេញទៅជួបគេ ហើយប្រាប់គេឱ្យរងចាំ មួយក្លេតសិន ព្រោះអ្នកផ្ដល់ប្រឹក្សាកំពុងតែរវល់។ នៅអំឡុងពេលដែលគេកំពុងតែរងចាំខ្ញុំក៏ និយាយលេងជាមួយពួកគេ ហើយបានសួរនាំពួកគេជាច្រើនអំពី ជីវិតប្រចាំថ្ងៃរបស់គេ នៅពេលហ្នុងនារីនោះបាននិយាយថា គេឈ្មោះ ស្រីដា សព្វថ្ងៃនេះនាងគឺជានារី ខារ៉ាអូខេ នាងធ្វើការនៅក្នុង ហាងខារ៉ាអូខេ មួយកន្លែងនាក្រុងភ្នំពេញ។ រៀងរាល់ថ្ងៃនាងទៅដល់កន្លែងធ្វើការ នាម៉ោង 6 កន្លះ ទៅ 7 ល្ងាច. ក្នុងមួយយប់ៗនាងតែងតែចូលកំដរភ្ញៀវច្រៀង និងផឹកស្រាមិនដែលខានឡើយ ហើយបើនិយាយអំពីប្រាក់ខែរបស់នាងវិញគឺ 1 ខែ 50 ដុល្លា ប៉ុណ្ណោះ មិនគ្រប់គ្រាន់សម្រាប់ការចាយវាយឡើយ ព្រោះនាងជួលផ្ទះគេនៅ ក្នុងមួយខែតម្លៃ 45 ដុល្លា. បើសរុបទាំងថ្លៃទឹក និងថ្លៃភ្លើងក្នុង 1 ខែត្រូវចំណាយអស់ 60 ទៅ 65 ដុល្លារ ប៉ុន្តែនាងរស់នៅជាក្រុមជាមួយមិត្តភក្តិដើម្បីជួយចេញគ្នា។
សព្វថ្ងៃនេះការរស់នៅរបស់នាងគឺ ពឹងផ្អែកទៅលើ លុយធិប ( ប្រាក់ដែលភ្ញៀវអោយចាយពេលអង្គុយកំដរ ) ជួនពេលខ្លះនាងបាន 3 ដុល្លា ជួនពេលខ្លះនាងបាន 5 ដុល្លា ប៉ុន្តែនាងត្រូវស្រវឹងរាល់យប់។ នាងបាននិយាយប្រាប់បន្ថែមទៀតថា ខ្ញុំមិនចង់ធ្វើជានារីខារ៉ាអូខេ ឡើយព្រោះមនុស្សទូទៅតែងតែ មើលងាយខ្ញុំ ហើយណាមួយទៀតខ្ញុំត្រូវតែព្យាយាមផឹកស្រារាល់យប់ឥតដែលខាន ខ្ញុំជាស្រីតើខ្ញុំអាចមានសុខភាពដើម្បីផឹកស្រាបានរាល់ថ្ងៃដែរអ្ហី? បើមួយថ្ងៃទៅមួយថ្ងៃ មួយខែទៅមួយខែ ខ្ញុំផឹកស្រាតែរហូត ឥតឈប់សោះ ថ្ងៃខ្លះទៀតខ្ញុំឈឺ មិនអាចផឹកស្រាបានឡើយដូចនេះមិនបានទៅធ្វើការទេ នោះថៅកែនឹង កាត់ប្រាក់ខែ 5 ដុល្លា។
សរុបសេចក្ដីមកវិញ តើបញ្ហានេះនរណាជាអ្នកទទួលខុសត្រូវ ? ខ្ញុំគិតថាមានតែ ខ្លួនគាត់ប៉ុណ្ណោះដែលអាចជួយខ្លួនគាត់បាន ដោយព្យាយាមរកវិធីណាដើម្បីជាសចេញពីសង្គមបែបហ្នុង និងប្រកបមុខរបរផ្សេងវិញម្ដង។
Read Full Post | Make a Comment ( 16 so far )
